काभ्रेमा १७ यात्रु वोकेको विमान दुर्घटना : कारण के हो ?

तुम्लिङटारबाट १७ जना यात्रु बोकेर काठमाडौंका लागि उडेको विमान देवीस्थानमा दुर्घटना भयो ।

दिउँसो १२ बजे काभ्रेको देवीस्थानमा एक्कासि होहल्ला मच्चियो । ‘केही यात्रुको मृत्यु भयो र केही घाइते भए,’ प्रहरी सेलमा यस्तो खबर आयो ।

तत्काल प्रहरीका उद्धारकर्मी घटनास्थल पुगे । मृतकका शव बटुलियो । घाइतेको उद्धार गरियो ।

त्यसबेलासम्म काभ्रे देवीस्थान आसपास विमान दुर्घटना भएको हल्ला फैलिसकेको थियो । स्थानीयवासी अत्तालिँदै दुर्घटनास्थल आए । उद्धारमा जुट्न थाले ।

नजिकै रहेको धुलिखेल अस्पतालले चिकित्सक र नर्सलाई तयारी अवस्थामा राख्यो । अस्पतालका एम्बुलेन्सलाई पनि तयारी अवस्थामा राखियो ।

अस्पतालमा दौडधुप चलिरहँदा स्थानीयमा समेत निकै त्रास भयो । खैलाबैला नै मच्चियो । तुम्लिङटारबाट उडेको सो विमान २७ किमि जति उडेपछि देवीस्थानमा दुर्घटना भयो ।

प्रहरी र स्थानीयले घाइतेको उद्धार गर्दै गर्दा त्रिभुवन विमानस्थलका कर्मचारी सुरक्षाकर्मीसहित घटनास्थल पुगे । उद्धारमा जुटे । स्थानीयवासी त्यसबेलासम्ममै त्रासमा थिए ।

प्रहरीका स्थानीय सेटमा विमान हराएको र दुर्घटना भएको खबर गरियो । त्यसपछि उद्धारकर्मी तत्कालै परिचालित भए ।

प्रहरीको बैठक भयो । रिपोर्ट गर्ने दौडधुप भयो । विमान देवीस्थानमा दुर्घटना भएको खबर पनि प्रहरीले स्थानीय सुरक्षा संयन्त्रमा सेटबाटै गरायो । घाइते र मृतकको संख्या पनि भनियो ।

तर, स्थानीय त्यसबेला चकित परे, जब प्रहरीले नक्कली दुर्घटना गराइएको भन्यो । विमानस्थल सुरक्षागार्ड प्रमुख प्रहरी वरिष्ठ उपरीक्षक (एसएसपी) सन्दीप भण्डारीका अनुसार विमान उडाउनेदेखि लिएर दुर्घटना गराउनेसम्मका सबै कार्य नियोजित र नक्कली हुन् । उनका अनुसार विमान दुर्घटना भए कसरी उद्धार गर्ने भनेर अभ्यासका लागि नियोजित रुपमा यसो गरिएको हो ।

‘सर्च एन्ड रेस्क्यु’ अभियानअन्तर्गत विमानस्थल र प्रहरीले संयुक्त रुपमा यो अभ्यास गरेका हुन् ।

एसएसपी भण्डारीका अनुसार विपद् व्यवस्थापन गर्न सजिलो होस् भनेर पूर्वअभ्यास भएको हो । यसले दुर्घटना भइहाले उद्धारमा कसरी जुट्ने भनेर सहयोग पुर्याउने उनको दाबी छ ।शिलापत्र बाट